ව/කු/ගිරි/මයුරාවතී මහ විදුහල් මෑණියන් මයුරාවතී කෝරළය වෙත සිප් නැණ පහන් දැල්වීමෙන් ප්රඥාලෝකය සැපයීමේ මෙහෙවරට දැනට සිය වසකට අධික කාලයක් ගතවී තිබුණත් ප්රදේශයටම පොදු, සොබා දහමේ ගැටළුවක් ව පැවති වසරේ වැඩි කාලයක් ජල හිඟයකට මුහුණ පාන්නට සිදුවීම පාසල පවත්වා ගැනීමට මහත් බාධාවක්ව පැවතුණි. පාසල අවට මහජන නියෝජිතයන්ගේ මෙන්ම සුබ පතන්නන්ගේද සහායෙන් මෙවැනි දුෂ්කර කාලවකවානු පසුකිරීමට සිදුවූ මයුරාවතී විදු මෑණියන්ට 2023 වසරේ ස්ථීර ළිඳක් ඉදිකිරීමේ අරැණළු වැටෙන්නට වුයේ Kansarmen SL Foundation ආයතනය මඟින් පාසලට දක්වන ලද සුවිශේෂී අනුග්රහය නිසාවෙනි.
මෙතෙක් පාසල් පරිසරය පුරා පැවති වියළි මළානික පෙනුම නැවුම් හරිත වර්ණයකට හරවමින් දරුකැළගේ පවස සංසිඳවමින් මුහුණු පුරා සිනාමල් කැන්දීමට පසු ගිය 2023ක්වූ අගෝසතු මස 09 වෙනි දින මංගල පස් පිඩැල්ල කපමින් ආරම්භ කළ ළිඳ ඉදිකිරීමේ ව්යාපෘතිය සමත් විය. මේ වන විට විදු පියස සිසාරා ජලනල පද්ධතියක් සපයමින් කදිම ජල යෝජනා ක්රමයක් ස්ථාපිත වී ඇති අතර දුටු දුටුවන්ගේ මන නුවන් අමන්දානන්දයට පත් කරමින් ජල ව්යාපෘතිය මල්ඵල ගන්වා ඇත්තේ පාසල් දරු පරපුරගේ නිල් දිය පවසට මහඟු අස්වැසිල්ලක් සපයා දෙමිණි.
